سورت البقرہ (رکوع 1 تا 7) – ہندکو ترجمہ

سورت البقرہ : رکوع 1، پارہ 1

شروع کرنا اللہ نے ناں توں جیڑا بڈا رحمان تے رحیم اے
1:- ا ل م
2:- او اچی کتاب جس بچ کوئی شک نی اور اے ہدیت اے ڈرنڑیں والیاں واسطے
3:- جیڑے چھپیاں شئیاں تے ایمان رکھڑیں نوں ، نماز پڑھنے نوں اور اساں انہاں جے کج وی دتا اے اس بیچوں خرچ کرنے نوں،
4:- جیڑےلوک اس اتے یقین رکھنے نوں جیڑا تساں تے لایا اے اور تساں توں پہلے لایا ایا اور قیامتی تے وی یقین رکھنے نوں
5:- او ای لوک سدھے راہے تے نوں تے او ای لوک کمیاب وی نوں
6:- اس بچ کوئی شک نی جنہاں لوکاں کفر کیتا اے انہاں تسی ڈراؤ یا نہ ڈراؤ او ایمان نی آنڑنے او
7:- اللہ انہاں نیا دلاں اتے مہر لا چھڑی اے اور اکھیاں تے پڑدہ پا چھڑیا اے اور انہاں واسطے بڈا عذاب اے
رکوع نمبر 1 مکمل

سورت البقرہ : رکوع نمبر 2

8:- اور کج لوک آکھنے نوں اساں نا ایمان اے اللہ اور قیامت تے پر او ایمان نی آنڑنے
9:- آپڑیں داروں اللہ اور مومناں تھوکا(دھوکا) دینے نوں پر او آپ دھوکے بچ نوں انہاں سمجھ نی
10:- انہاں نیاں دِلاں بچ بیماری اے اللہ بیماری بَدا چھڑی اے انہاں واسطے دردناک عذاب اے کیونکہ او کوڑے نوں
11:- جدوں انہاں آکھو زمی بچ فساد نہ کرو تے او آکھنے نو اساں تے صرف اصلاح کرنے آں
12:- اس بچ کوئی شک نی کہ او فسادی نوں پر او سمجھنے نی نوں
13:- جدوں انہاں آکھو کہ تسی ایمان آنڑو او آکھنے اسی ایمان آنڑاں جینجو بیوقوف ایمان آنڑنے نوں سنڑو او آپ بیوقوف نوں پر انہاں سمجھ نی
14:- اور جدوں ملنے نوں جیڑے ایمان کن آئے نوں انہاں آکھنے نوں اساں وی ایمان تے آں اور جدوں آپڑیاں شیطاناں کول کَلے ہونے نوں تے آکھنے نوں اسیں تے مذاح کرنے آں
15:- اللہ انہاں نال مذاح کرنا اے تے انہاں غلط فہمی بچ اَنا رکھیا سو
16:- اے ای لوک جنہاں ہدیت نے بدلے گمراہی کدی اے انہاں نہ تے کم کاج (تجارت) کوئی فیدا دیسی تے نہ انہاں ہدیت ملسی
17:- انہاں نی مثال اس بندے والی گل اے جس آپڑیں کول اگ لائی اور اگی لُو (روشنی) کیتی تے اللہ اُساں اَنا کر چھڑیا او دیکھ ہی نی کننا
18:- او ڈورے گونگے اَنے نوں اور او نی مڑنے
19:- یا جینجو آسمان اتے بدل ہووے اس بچ آنیرا ہووے اور گرج چمک ہووے بجلی نی او آپڑیاں کنا (کان) بچ انگلیاں پاکننے نوں موتو(موت) نے ڈرے نال اللہ کافراں نے آسے پاسے ہویا اے
20:- نیڑے ای اے کہ بجلی انہاں نیاں اکھیاں کڈ کنے جدوں بجلی چمکنی اے اوٹر پینے نوں تے نیرا ہونا اے تے کھل رہنے نوں اللہ چاہوے تے انہاں کولوں کن تے اکھیاں چاہ کنے اللہ ہر چیزاں تے قادر اے
سورت البقرہ رکوع 2 مکمل

سورت البقرہ : رکوع نمبر 3

21:- اے لوکو آپڑیں اللہ نی عبادت کرو جس تساں جمایا اے اور تساں تو پہلے والیاں تاکہ تسی پرہیز گار ہو جلو
22:- جس تساں وسطے زِمی فرش آسمان چھت اور آسمان توں پاڑیں لایا اے اس نال فروٹ تساں نے کھانڑیں واسطے جمایا سو اللہ نال کسے آں شریک نہ کرے او،، تسیں اساں سیانڑنے او
23:- اگر اس کتاباں بچ شک ہووے نے جیڑی اساں آپڑیں بندے تے لائی اے تے تسیں اس جئی اک (1) سورت آنڑو بلاؤ سارے سنگی تے یار اگر تسی سچے او تے
24:- فر اگر تسیں نہ کر کنو جیڑا تسیں کر وی نی اَکنے او تے ڈرو اس اَگی کولوں جس نا بالنڑ (ایندھن) انسان تے گٹے (پتھر) نوں او کافراں وسطے ای تیار کیتی اے
25:- انہاں لوکاں خوشخبری دیو جنہاں ایمان آندا اے اور نیک کم کیتے نے انہاں وسطے باغ نوں جنہاں تلے کٹھے (نہریں) بگنے نوں جدوں انہاں کوئی فروٹ کھانڑیں وسطے دیو تے او آکھنے نوں اے او ای اے جیڑا پہلے دِتا نے حالانکہ اے اُس نال ملنا جلنا اے انہاں وسطے ایتھے پاک بُڈیاں (بیویاں) نوں اے ہمیشہ اسے بچ رہسن او
26:- اس بچ کوئی شک نی کہ اللہ نی شرمانا مچھر جئی مثال دینیوں وی اس تو بد کہ جنہاں ایمان آندا اے انہاں پتہ اے کہ اے ای حق اے اور جنہاں کفر کیتا اے او آکھنے نوں کہ اللہ نا اس مثالاں نا مطلب کے وے اللہ اس نال بہوں لوکاں گمراہ وی کرنا اے تے اس نال ہدیت وی دینا اے اور او اس نال نافرماناں توں بغیر کسے آں گمراں نی کرنا او
27:- او جیڑے لوک اللہ نال وعدہ کرکے تروڑنے نوں اس آں کپنے نوں جس نا اللہ حکم دتا اے اور اس آں جوڑ کے رکھن او اور او زمی بچ فرساد پانے نوں اے ای لوک نقصان چاڑیں والے نوں
28:- تسیں کس طرح اللہ نال کفر کرنے او تسیں بے جان اے او تے اس تساں زندگی دتی اے او ای موت وی دیسی نے تساں ساڑسی وی اس دار ای تسیں مڑ کہ جُلسو
29:- او ای اے جس تساں وسطے پیدا کیتا اے جو کج وی زِمی بچ اے فر اُس آسمان دار قصد کیتا اے تے انہاں ٹھیک کرکے ست (7) بنڑا چھڑے سو او ہر شئیے (چیز) آں سمجھنا اے
سورت البقرہ رکوع 3 مکمل

سورت القبرہ : رکوع 4

30:- جدوں اللہ فرشتیاں آکھیا کہ میں زمی بچ اک نائب بنڑاؤنڑ لگا واں انہاں آکھیا او فرساد کرسی خون روڑسی او ، اسیں بے عیب تینڑیں تعریف کرنے آں اور پاکی بیان کرنے آں اُس آکھیا میں جو کج سمجھنا واں او تسی نی سمجھنے او
31:- اس آدم عیہ آں ساریاں شئیاں (چیزاں) نے ناں دسے اور فر فرشتیاں نے سامڑیں کر کے پچھیا کہ ناں دسو اگر تسیں سچے او تے
32:- انہاں آکھیا کہ توں پاک ایں تداں سارا کج پتا اے اساں نی پتا اِس توں علاوہ جیڑا کج توں سکھایا اے اس بچ کوئی شک نی او کہ توں جانڑنے والا تے حکمت والا ایں
33:- اس آکھیا فر کہ اے آدم عیہ انہاں دس او انہاں نے ناں فر آدم عیہ دسے ناں فر اللہ آکھیا کہ میں سمجھنا واں آسمان تے زمی بچ سارا کج جو کج تسیں سامنڑیں آنڑنے او اور جو کج تسیں چھپانے او
34:- اور جس ٹیم اساں فرشتیاں آکھیا کہ تسیں اِساں سجدہ کرو ابلیس تو علاوہ ساریاں سجدہ کیتا ابلیس تکبر کیتا اور او کافر ہو گیا
35:- اور اللہ آکھیا اے آدم عیہ توں تے تینڑیں بڈی (بیوی) اس جنت بچ رہو کھاؤ پیو جتھوں مرضی اے بس اس بُوٹے کول نہ جُلے نہیں تے تسیں وی ظالماں بیچوں ہو جلسو
36:- فر شیطان انہاں پُلایا اور کڈوایا اس جنت توں اَساں آکھیا کہ تسیں نکل جلو تساں بیچوں کج ، کج نے دشمنڑ نوں تساں واسطے زمی ہی اے اک ٹیم (وقت) تک سامان زندگی نا
37:- فِر آدم عیہ کج گلاں چا کدیاں اور فر اللہ انہاں نی توبہ قبول کر کدی او ای توبہ قبول کرنڑیں والا رحم کرنڑیں والا اے
38:- اَساں آکھیا کہ تسیں سارے نکل جلو جدوں کوئی ہدیت مِلے نے فر جیڑا ہدیت نے راہے (راستہ) تے چلیا اُساں نہ کوئی کوئی خوف ہوسی تے نہ ہی کوئی غم ہوسی سو
39:- اور جنہاں لوکاں کفر کیتا اور آیتاں نی مننے او او سارے دوزخ بچ ہمیشہ رہسن او
سورت البقرہ رکوع 4مکمل

سورت البقرہ : رکوع 5

40:- اے نبی اسرائیل مینڑیاں نعمتاں یاد کرو جیڑیاں میں تساں دتیاں او اور تسیں مینڑاں وعدہ پورا کرو میں تساں نا وعدہ پر کرساں اور تسیں مینڑیں کولوں ای ڈرو
41:- اِس اُتے ایمان آنڑو جیڑا کج میں لایا اے اس نی تسلی (تصدیق ) کرنڑیں آلے تے وی جیڑا تساں کول اے اور کافراں نال نہ ہو جلو اور مینڑیاں آیتاں نے بدلے پیسے نہ کنو اور مینڑیں کولوں ای ڈرو
42:-اور نہ مِلاؤ سچ آں کُوڑ نال اور سچ نہ چھپاؤ جیڑا تساں پتا اے
43:- نماز قیم کرو زکوٰۃ دینڑیں والیاں نال دیا کرو اور رکوع کرنڑیں والیاں نال رکوع کرو
44:- تسیں لوکاں نیکیاں نا آڈر دینے او تے آپے آں پہل (بھول) جلنے او حالانکہ تسیں کتاب پڑھنے او پر سمجھنے نی او
45:- نماز تے صبر کولوں مدد کِنو پر اے عاجزی کرنڑیں والیاں تو سوا بَڈا اوکھا اے
46:- عاجزی کرنڑیں والے یقین رکھنے نوں کہ او آپڑیں اللہ نے آمنڑیں سامنڑیں ہوسن او اور اِس دار ہی مُڑ کے جلسن او
سورت البقرہ رکوع 5 مکمل

سورت البقرہ: رکوع 6

47:- اے نبی اسرائیل مینڑیاں نعمتاں یاد کرو جیڑیاں تساں دتیاں نوں اور تساں سارے زمانے تے وڈا کیتا اے
48:- اُس دیاڑے کولوں ڈرو جس دیاڑے کوئی بندہ کسے نا بدلہ نی دینا نہ سفارش منی جلسی او نہ کوئی پیسے کننا اے تے نہ ای مدد ملنی اے
49:- اور فر تساں آل فرعون کولوں رہائی دتی اے او تساں واں دکھ دینے اے او تساں نیان پتراں (بیٹے) مار چھڑنے اے تے تِیاں(بیٹیاں) چھوڑ دینے اے ، اے وی تساں نے اللہ نی طرفوں بہوں بڈی آزمائش اے
50:- اور جدوں اساں تساں وسطے دریا پھاڑ چھڑیا تساں بچا کدا ایا اور فرعون آں اولادی سمیت غرق کیتا تسیں دیکھنے او پئے
51:- اور فر اساں موسٰی عیہ کولوں 40 دیاڑیاں نا وعدہ کدا تے تساں پچھے بچھے (بچھڑا) آں معبود بنڑا کدا تے تسیں ظالم ہوگئے او
52:- فر اساں تساں معاف کر چھڑیا تاکہ تسیں احسان منو
53:- اور فر موسٰی عیہ کتاب دتی الگ الگ حکم کرنڑیں والی تاکہ تسیں ہدیت چا کنو
54:- اور فر موسٰی عیہ آپڑیں قوم آں آکھیا کہ اے قوم بے شک تساں آپڑیں آپ تے ظلم کیتا اے بچھے آں خدا بنڑا کہ ہنڑ تسیں آپڑیں جمانڑیں (پیدا کرنے ) آلے دار جلو تے آپڑیاں مارو اے ای چنگا اے تساں نے جمانڑیں والے نے نیڑے فر اس تساں نی توبہ من کدی اے ای بے شک او ای اے توبہ منڑیں آلہ اور رحم کرنڑیں آلہ
55:- اور فر جدوں تساں آکھیا کہ موسٰی عیہ اسیں تداں نہ مننے جس ویلے تک اللہ واں سامنڑیں نہ دیکھ کنا فر بجلی نا گجڑاں(کڑک) تساں نے آسے پاسے ہو گیا اور تسیں دیکھنے او پئے
56:- فر تساں نی موتو توں بعد اساں تساں جینا کیتا اے تاکہ تسیں احسان منو
57:- اساں تساں اتے بدلاں (بادل) نی چھاں کیتی اور من و سلویٰ لایا تسیں او پاک شئیاں کھاؤ جیڑیاں اساں تساں دتیاں نوں انہاں اساں تے ظلم نی کیتا پر او آپڑیاں جاناں تے ظلم کرنے نوں
58:- اور فر اساں آکھیا کہ تسیں اس گرائیں بچ بَڑ جلو اور کھلا کھاؤ پر دروازے بیچوں بڑنیوں سجدہ کرکہ تے آکھیو کہ اللہ اساں بخش چھڑو تے میں تساں بخش چھڑساں اور نیکی کرنڑیں والیاں ہور دیساں
59:- فر ظالماں دوئے (2) گلاں بدلی کر چھڑیاں جیڑیاں انہاں آکھیا ایاں فر اساں ظالماں اتے عذاب لایا آسمان توں کیونکہ او نافرمانی کرنے اے او
سورت البقرہ رکوع 6 مکمل

سورت البقرہ :رکوع 7

60:- اور فر جدوں موسٰی عیہ آپڑیں قوم واسطے پاڑیں منگیا اساں آکھیا کہ سوٹی (عصاء) مار گٹے (پتھر) اتے فر بارہ چوئے (چشمے) نکل آئے ہر قوم آپڑاں چوا (چشمہ) چاہ کدا ، تسیں کھاؤ پیو اللہ نا رزق تے زمی بچ فرساد نہ پاؤ
61:- اور فر تساں آکھیا کہ موسٰی عیہ اسیں اکی (1) کھانڑیں تے صبر نہ کرنے تسیں اللہ اگے دعا کرو او کڈے زمی جو کج اگانی اے کج ترکاری،کڑنک (گندم) ، مسور ،پیاز موسیٰ عیہ آکھیا کہ تسیں بدلہ چاہنے او جو کج ادنٰی اے اساں چنگے نال تسیں بے شک شہر بچ جلو تساں وسطے ہوسی او جو کج تسیں منگنے او ،انہاں اتے ذلت تے محتاجگی پاچھڑی او ، مڑے اللہ نے قہر نال ، اے اس واسطے ہویا کیونکہ او اللہ نیاں آیتاں نے منکر اے اور ایویں ای بےغناہ (ناحق) نبیاں قتل کرنے او اور نافرمانی کرنے تے حد توں وی بد جلنے اے او

سورت البقرہ رکوع نمبر 7 مکمل

Leave a Reply

Leave a Reply

This site uses Akismet to reduce spam. Learn how your comment data is processed.

%d bloggers like this: