سورت التوبہ (رکوع نمبر 12 تا 17) – ہندکو ترجمہ

سورت التوبہ نا رکوع نمبر 12
پارہ نمبر 11 نا رکوع نمبر 1

94:- جدوں تُسیں اُنہاں دار مڑ کہ جُلسو تے او تُساں کول عذر کِن کہ آسن او آپ صہ آکھو کہ ہنڑ عذر نہ کرو اَسیں کدے وی تُساں نا یقین نہ کرنے او اللہ تُساں نیاں گلاں دس چھڑیا نوں اور ہنڑ اللہ تے رسول صہ تُساں نے عمل توں دیکھسن او فر تُسیں چھپیا ہویا تے سامنڑیں جانڑنے آلے اللہ دار جُلسو فر او تُساں دَسسی جو تُسیں کرنے او
95:- جدوں تُسیں اُنہاں دار مڑ کہ جُلسو ہنڑ او تُساں اگے اللہ نیاں قسماں کھاسن او تاکہ تُسیں درگزر کرو تے تُسیں اُنہاں توں منہ موڑ کنو او پلید نوں اُنہاں نا ٹھکانڑاں جہنم اے اُس نا بدلہ جو او کمانے اے
96:- او تُساں اگے قسماں کھانے نوں تاکہ تُسیں اُنہاں نال راضی ہو جُلو اگر تُسیں اُنہاں نال راضی ہو جُلسو تے اللہ راضی نی ہونا نافرمان لوکاں نال
97:- دیہاری کفر تے نفاق بچ بہوں باٹے نوں اور زیادے لیق کہ او نی جانڑنے جے جیڑے حکم اللہ رسول صہ تے لائے نوں اور اللہ جانڑنے آلہ حکمت آلہ اے
98:- اور کج دیہاتی اے نوں جیڑے اللہ نی راہے بچ خرچ کرنے نوں اُساں تاوان سمجھنے نوں اور تُساں وسطے اوکھے ویلے(گردشاں) نا انتظار کرنے نوں اُنہاں اُتے مندی گردش اے اللہ سنڑنے تے جانڑنے آلہ اے
99:- اور کج دیہاتی اے نوں جیڑے اللہ تے رسول صہ تے یقین کرنے نوں اور آخرت تے ایمان رکھنے نوں اور او جو کج خرچ کرنے نوں اُساں اللہ نے نیڑے اور رسول صہ کولوں دعائیاں کنڑیں نا ذریعہ سمجھنے نوں ہاں بلکل او نیڑے ہونڑیں نا ذریعہ اے اور اللہ جَلتی اے اُنہاں آپڑیں رحمت بچ شامل کرسی اللہ بخشڑیں آلہ بہوں مہربان اے
سورت التوبہ نا رکوع نمبر 12 مکمل

سورت التوبہ نا رکوع نمبر 13
پارہ نمبر 11 نا رکوع نمبر 2

100:- او ساریاں توں پہلے ایمان تے اسلام بچ بدڑیں (سبقت کرنے ) آلیاں مہاجراں تے انصار بیچوں نوں اور جنہاں نیکی نال اُنہاں نی پیروی کیتی اللہ اُنہاں توں راضی ہویا اور او اللہ توں اور اللہ اُنہاں وسطے باغات تیار کیتے نوں جنہاں تلے نہراں بگنیاں نوں او اُنہاں بچ ہمیشہ رہسن او اے بڈی کمیابی اے
101:- اور جیڑے دیہاتی تُساں نے آسے پاسے نوں اِنہاں بیچوں کج نفاق تے اڑے نوں تُسیں اُنہاں نی جانڑنے او اسیں اُنہاں سیانڑنے آں اور اَسیں جَلتی ای اُنہاں دوبارہ عذاب دیساں اور فر او ڈاڈے عذاب دار جُلسن او
102:- اور کج ہور نوں جنہاں آپڑیں غناہ نا اعتراف کر کدا اے اُنہاں اک چنگا تے دو آ مندا کم ملا کدا اے نیڑے اے کہ اللہ اُنہاں معاف کر چھڑے اللہ تے بخشڑیں آلہ بہوں مہربان اے
103:- آپ صہ اُنہاں نیاں مالاں بیچوں زکوٰۃ چا کنو اور اُنہاں پاک تے صاف کر چھڑو اس توں اور اُنہاں وسطے دعائے خیر کرو بے شک آپ صہ نی دعا اُنہاں وسطے سکون نا باعث اے اور اللہ سنڑنے آلہ تے جانڑنے آلہ اے
104:- کیا اُنہاں علم نی کہ اللہ ای آپڑیاں بندیاں نی توبہ قبول کرنا اے اور قبول کرنا اے صدقے اور اے کہ اللہ توبہ قبول کرنڑیں ْآلہ مہربان اے
105:- آپ صہ آکھو کہ تُسیں عمل کرو بس ہنڑ اللہ تے اُس نا رسول صہ اور مومن تُساں نے عمل دیکھسن او اور تُسیں جَلتی چھپیا ہویا تے ظاہر جانڑنے آلے او اور اللہ دار مڑ جُلسو او تُساں دسسی جو تُسیں کرنے او
106:- اور کج ہور نوں جیڑے اللہ نے حکم تے چھپا کہ رکھے گئے نوں خواہ او اُنہاں عذاب دیوے یا اُنہاں نی توبہ قبول کرے اللہ جانڑنے آلہ حکمت آلہ اے
107:- اور او لوک جنہاں مسجد ضرار نقصان کرنڑیں اور کفر کرنڑیں وسطے بنڑائی اور مومناں بچ پھوٹ پاڑیں وسطے اور گھات نی جائی وسطے جِس اللہ تے رسول صہ نال جنگ کیتی اِس توں پہلے ہاں البتہ او قسماں چاسن او کہ اَساں تے بھلائی چاہی اور اللہ گواہی دینا اے کہ او یقنناً کوڑے نوں
108:- آپ صہ اِس بچ کدے وی نہ کھلے بے شک او مسجد جس نی بنیاد پہلے دیاڑے توں تقویٰ تے رکھی اے زیادے لیق اے کہ آپ صہ اُس بچ کھلو اِس بچ اے او جئے لوک نوں جیڑے چاہنے نوں کہ او پاک رہو نوں اور اللہ سنگی رکھنا اے پاک رہنڑیں آلیاں
109:- تے کیا او جِس آپڑیں عمارت نی بنیاد اللہ نے ڈرے تے خوشی وسطے رکھی اے او چنگی اے یا او جِس آپڑیں عمارت نی بنیاد ٹہنڑیں آلے کھڈے (کھائی) تے رکھی اے اِساں کن کے دوزخ بچ ٹہہ پئی اور اللہ ظالماں ہدیت نی دینا
110:- اور عمارت جِس نی اُنہاں نے بنیاد رکھی ہمیشہ شک پانی رہسی اُنہاں نیا دِلاں بچ پر اے کہ اُنہاں نے دِل ٹکڑے ٹکڑے ہو جُلن اللہ جانڑنے آلہ حکمت آلہ اے
سورت التوبہ نا رکوع نمبر 13 مکمل

سورت التوبہ نا رکوع نمبر 14
پارہ نمبر 11 نا رکوع نمبر 3

111:- بے شک اللہ مومناں کولوں اُنہاں نیا جانیاں خرید کنیا اور اُنہاں نے مال اِس نے بدلے کہ اُنہاں وسطے جنت اے اور او کُلنے نوں اللہ نی راہے بچ مارنے وی نوں تے مرنے وی نوں اِس اُتے سچا وعدہ اے توریت ، انجیل اور قرآن بچ اور اللہ توں زیادے کِس نا وعدہ سچا اے بس تُسیں اُس نا مال اِس سودے تے خوشیاں مناؤ اور اے بڈی کمیابی اے
112:- توبہ ، عبادت ، حمد و ثناء ، سفر ، رکوع ، سجدہ کرنڑیں آلے نیکی نا حکم تے مندج گلاں توں ڈکڑیں آلے اور اللہ نیاقیم حداں نی حفاظت کرنڑیں آلے مومناں خوشخبری دیو
113:- نبی صہ اور مومناں نی شان نی کہ او مشرکاں وسطے بخشش منگن او خواہ او اُنہاں نے رشتے دار ہون او اِس توں بعد کہ جدوں ظاہر ہو گیا کہ او دوزخ آلے نوں
114:- ابراہیم عیہ آپڑیں پیو وسطے بخشش نی چاہنے پر اک وعدے نے سبب جیڑا او پیو نال کر رہے او فر جدوں اُنہاں تے ظاہر ہو گیا کہ او اللہ نا دشمنڑ اے تے او اِس توں بیزار ہو گئے او بے شک ابراہیم عیہ نرم دل بردبار اے
115:- اور اللہ اے جیا نی کہ کِسے آں اِس توں بعد گمراہ کرے جدوں اُس اُساں ہدیت دتی ہووے جدوں تک اُنہاں تے واضح نہ کر چھڑے کہ او پرہیز کرن بے شک اللہ ہر شئے آں جانڑنے آلہ اے
116:- اللہ وسطے ای اے زمی تے آسمان نی بادشاہی اور او ای زندگی دینا اے اور مارنا اے اور تُساں وسطے اللہ توں بغیر نہ کوئی حمیتی تے نہ کوئی مددگار
117:- البتہ توجہ کیتی اللہ نبی صہ مہاجرین اور انصار تے اور جنہاں تنگی نے ویلے اُنہاں نی پیروی کیتی اِس توں بعد وی کہ نیڑے ای ایا کہ اک گروہ نے دل پھر جُلسن فر او اُنہاں تے متوجہ ہویا او اُنہاں تے نہایت ای شفیق تے مہربان اے
118:- اور اُنہاں 3 جنہاں نا معاملہ پچھے دسیا اے ایتھے تک کہ اُنہاں تے زمی تنگ ہو گئی او کشادگی نے باوجود اور اُنہاں تے اُنہاں نیا جانیاں تنگ ہو گئیاں اور اُنہاں جانڑ کدا کہ اللہ توں کوئی پناہ نی پر اُسے نی طرف اے فر او اُنہاں اُتے آپڑیں رحمت نال متوجہ ہویا تاکہ او توبہ کرن بے شک اللہ توبہ قبول کرنڑیں آلہ مہربان اے
سورت التوبہ نا رکوع نمبر 14 مکمل

سورت التوبہ نا رکوع نمبر 15
پارہ نمبر 11 نا رکوع نمبر 4

119:- اے ایمان آلیو اللہ توں ڈرو اور سچے لوکاں نال ہو جُلو
120:- لائق نی ایا کہ مدینے آلے اور جیڑے اِس نے آسے پاسے دیہاتی رہنے نوں اور اللہ نے رسول صہ کولوں پچھنے رہو نوں اور اے کہ او آپڑیاں جانیاں حضور نی جانی کولوں زیادہ چاہسن او اے اس کر کے کہ اُنہاں کوئی پیاس ،سختی، بھوک نی ملنی اللہ نی راہ بچ اور نہ او اے جیا کم کرن کے کافر غصے ہون او اور نہ او کھسنے نوں دشمنڑ کولوں کوئی چیز پر اِس توں اِس نے بدلے اُنہاں وسطے نیک عمل لکھیا جُلنا اے اللہ بے شک اجر ضائع نی کرنا نیک لوکاں نے
121:- او کوئی نکا یا بڈا یا تھوڑا یا زیادے خرچ نی کرنے اور نہ او طے کرنے نوں کوئی میدان مگر اُنہاں وسطے لکھ دتا جُلنا اے اور اللہ اُنہاں نے اعمال نی اُنہاں بہترین جزا دیسی
122:- اور اینجو نی کہ مومن ساریاں نے سارے کوچ کرن او پس کیوں نہ اُنہاں نے ہر گروہ بیچوں اک جماعت کوچ کرے تاکہ او سمجھ حاصل کرن او دین بچ تاکہ او آپڑیں قوم آں ڈر سناؤن او جدوں اُنہاں دار مڑن او عجب نی کہ او بچنے رہو نوں
سورت التوبہ نا رکوع نمبر 15 مکمل

سورت التوبہ نا رکوع نمبر 16
پارہ نمبر 11 نا رکوع نمبر 5

123:- اے مومنو ! آپڑیں نیڑے نیاں کافراں نال کُلو اور چائی نا اے کہ او تُساں بچ سختی دیکھن اور سمجھ کِنو کہ اللہ پرہیزگاراں نال اے
124:- اور جدوں کوئی سورت لائی جُلنی اے تے اُنہاں بیچوں کج آکھنے نوں کہ اِس تُساں بیچوں کِس نا ایمان زیادے کیتا اے سو جیڑے لوک ایمان کِن آئے اُس زیادے کر چھڑیا اُنہاں نا ایمان اور او خوشیاں منانے نوں
125:- اور او لوک جنہاں نے دِلے بچ بیماری اے اُس زیادے کر چھڑی اُنہاں نی گندگی اور او مرنے تک کافر ای رہسن او
126:- کیا او نی دیکھنے کہ او ہر سال آزمائے جُلنے نوں اک دفعہ یا دو دفعہ فر نہ او توبہ کرنے نوں اور نہ ای نصیت پکڑنے نوں
127:- اور جدوں کوئی صورت لائی جُلنی اے تے اُنہاں بیچوں اِکی دوئے آں دیکھنے نوں کیا تُساں کوئی مسلمان دیکھنا اے فر او پھر جُلنے نوں اللہ اُنہاں نے دِل پھیر چھڑے نوں کیونکہ او نی سمجھنے
128:- البتہ تُساں کول آیا اک رسول صہ تُساں بیچوں جیڑا تُساں نی تکلیف تے خفے اور سکون تے خوش ہونا اے مومناں اُتے بہوں شفیق تے مہربان اے
129:- فر اگر او منہ موڑن تے آکھو ماں جہان اے اللہ اِس توں سوا نی کوئی معبود میں اُس اُتے ای بھروسہ کیتا اے اور او عرش عظیم نا مالک اے
سورت التوبہ نا رکوع نمبر 16 مکمل

سورت التوبہ مکمل

Leave a Reply

Leave a Reply

This site uses Akismet to reduce spam. Learn how your comment data is processed.

%d bloggers like this: