سورت التوبہ (رکوع نمبر 1 تا 4) – ہندکو ترجمہ

سورت التوبہ نا رکوع نمبر 1
پارہ نمبر 10 نا رکوع نمبر 7

1:- اللہ تے رسول صہ نی طرفوں قطع تعلق اے مشرکاں نال جنہاں تُساں نال عہد کیتا ایا
2:- بس مشرکو 4 مہینے زمی بچ ٹرو پھرو اور سمجھ کنو کہ تُسیں اللہ عاجز نی کر اکنے او اور اے کہ اللہ کافراں رسوا کرڑیں آلہ اے
3:- اور اللہ تے رسول صہ نی طرفوں حج اکبر نے اُنہاں لوکاں وسطے اعلان اے کہ اللہ تے رسول صہ نا مشرکاں نال قطع تعلق اے پر اگر تُسیں توبہ کر کنو تے او تُساں وسطے چنگا اے اور اگر تُساں منہ پھیر کِدا تے تُسیں سمجھ کنو کہ اللہ واں عاجز نی کر اکنے او اور آگاہ کر چھڑو اُنہاں لوکاں جنہاں کفر کیتا دردناک عذابے نال
4:- سوائے اُنہاں مشرک لوکاں جنہاں توں تُساں عہد کیتا فر اُنہاں تُساں نال عہد بچ کمی نی کیتی اور نہ اُنہاں تُساں نے خلاف کِسے نی مدد کیتی اے تے اُنہاں نال عہد مقررہ ٹیم تک پورا کرو بے شک اللہ پرہیزگاراں سنگی رکھنا اے
5:- فر جدوں حرمت آلے مہینے لنگ جُلن او تے مشرکاں قتل کرو جتھے اُنہاں دیکھو اُنہاں پکڑو تے گھیر کنو اُنہاں وسطے ہر گھات بچ بہو فر اگر او توبہ کرکنو نوں اور نماز قیم کرن زکوٰۃ دیون او تے اُنہاں نا راہ چھوڑ دیو بے شک اللہ بخشڑیں آلہ بہوں مہربان اے
6:- اور اگر مشرکاں بیچوں کوئی تُساں کولوں پناہ منگے تے اُنہاں چا دیو ایتھے تک کہ او اللہ نا کلام سنڑ کنونوں فر اُساں اُنہاں نے امن نی جائی پہنچا چھڑو اے اِس کر کے اے کہ او لوک علم نی رکھنے چلہے (نادان) نوں
سورت التوبہ نا رکوع نمبر 1 مکمل

سورت التوبہ نا رکوع نمبر 2
پارہ نمبر 10 نا رکوع نمبر 8

7:- کیوں ہووے اللہ تے رسول صہ کول مشرکاں وسطے کوئی عہد سوائے اُنہاں لوکاں نے جنہاں نال تُساں کعبہ کول عہد کیتا سو جدوں تک او عہد تے قیم رہو نوں تُسیں وی قیم رہو بے شک اللہ پرہیزگاراں سنگی رکھنا اے
8:- کینجو صلح ہووے حال اے اے کہ اگر او غالب آ جُلن او تے او نی لحاظ رکھنے او رشتہ داری تعلق یا عہد نا اور صرف تُساں نال راضی کر چھڑنے نوں لیکن اُنہاں نے دل نی مننے او اور اُنہاں بیچوں اکثرنافرمان نوں
9:- اُنہاں اللہ نے احکام تھوڑی قیمتاں تے بیچ چھڑے نوں فر اُنہاں اللہ نی راہے توں ڈکیا بے شک مندا اے جو او کرنے نوں
10:- اور کِسے مومن نے بارے بچ نہ قرابت تے نہ ای عہد نا لحاظ رکھنے نوں بے شک اے لوک حد توں بدڑیں آلے نوں
11:- فر اگر او توبہ کر کنو نوں نماز قیم کرن اور زکوٰۃ دیون او تے او تُساں نے پرا (بھائی) نوں دین بچ اور اَسیں آیتاں کھول کہ بیان کرنے آں اُنہاں لوکاں وسطے جیڑے علم رکھنے نوں
12:- اور اگر او آپڑیاں قسماں تروڑ چھڑن او تے عہد توں بعد اور تُساں نے دین بچ عیب کڈن تے کفر نیا سرداراں نال جنگ کرو بے شک اُنہاں نیا قسماں کج نی نوں شائد او باز آجُلن او
13:- کیا تُسیں اُس قوم نال نی کُلے (لڑے) او جنہاں آپڑاں عہد تروڑ چھڑیا اور اُنہاں رسول صہ آں جلاوطن کرڑیں نا ارادہ کیتا ایا اور اُنہاں تُساں نال پہل کیتی کیا تُسیں اُنہاں توں ڈرنے او تے اللہ زیادے حق رکھنا اے کہ تُسیں اُس کولوں ڈرو اگر تُسیں ایمان آلے او تے
14:- تُسیں اُنہاں نال کُلو ایتھے تک کہ اللہ اُنہاں عذاب دیوے اور تُساں نیاں ہتھاں نال ذلیل کرے اور تُساں اُنہاں اُتے غالب کرے اور مومناں نے دل ٹھنڈے کرے
15:- اور اُنہاں نیاں دِلاں بیچوں غصہ دور کرے اور اللہ جِس نی چاہوے توبہ قبول کرنا اے اور اللہ علم آلہ حکمت آلہ اے
16:- کیا تُسیں گمان کرنے او کہ تُسیں چھوڑ دتے جُلسو جبکہ اللہ ہالے پتا نی کیتا تُساں بیچوں جنہاں جہاد کیتا اور اُنہاں نی بنڑایا کِسے آں اللہ رسول صہ اور مومناں توں بغیر رازدار اور اللہ اِس توں باخبر اے جو کج تُسیں کرنے او
سورت التوبہ نا رکوع نمبر 2 مکمل

سورت التوبہ نا رکوع نمبر 3
پارہ نمبر 10 نا رکوع نمبر 9

17:- مشرکاں نا کم نی کہ او اللہ نیاں مسجداں آباد کرن او جبکہ او آپڑیں اتے کفر تسلیم کرنے ہون او اے او ای لوک نوں جنہاں نے عمل اکارت دتے گئے نوں اور ہمیشہ جہنم بچ رہسن او
18:- اللہ نی مسجداں او ای آباد کرنا اے جیڑا اللہ تے قیامتی تے ایمان رکھنا اے اور اُس نماز قیم کیتی زکوٰۃ دتی اور او اللہ توں سوا کِسے توں ڈرنا ہووے سو امید اے کہ او ای لوک ہدیت پاڑیں آلیاں بیچوں نوں
19:- کیا تُساں حاجیاں پاڑیں پلانڑاں اور کعبے آں آباد کرنا اُس نے برابر ٹھہڑایا اے اللہ نے نیڑے جیڑے ایمان آنڑنے نوں اللہ تے قیامتی تے اور اللہ نی راہ بچ جہاد کرنے نوں او اللہ نے نیڑے برابر نی نوں اور اللہ ظالماں لوکاں کدے وی ہدیت نی دینا
20:- جیڑے لوک ایمان کن آئے اُنہاں ہجرت کیتی اور اللہ نی راہے بچ آپڑیں مال تے جانی نال جہاد کیتا اُنہاں نے درجے بہوں بڈے نوں اور اے ای لوک مراد پاڑیں آلے نوں
21:- اُنہاں نا اللہ اُنہاں آپڑیں طرفوں رحمت خوشنودی تے باغاں نی خوشخبری دینا اے اُنہاں بچ اُنہاں وسطے دائمی نعمت اے
22:- او اس بچ ہمیشہ رہسن او بے شک اللہ کول بڈا اجر عظیم اے
23:- اے ایمان آلیو آپڑیں پیو دادے آں تے پراواں سنگی نہ بنڑاؤ اگر او ایمان نے بدلے کفر آں پسند کرن او اور تُساں بیچوں جیڑا اُنہاں نال دوستی کرسی تے اے ای لوک ظالم نوں
24:- اگر تُساں نے پیو دادے ، پتر ، پرا ، بیویاں ، خاندان مال جیڑا تُساں کمایا اے اور تجارت جِس نے نقصان توں تُسیں ڈرنے او اور حویلیاں جنہاں تُسیں پسند کرنے او تُساں اللہ رسول صہ اور اللہ راہ بچ جہاد توں زیادے چنگے ہون او تے انتظار کرو ایتھے تک کہ اللہ نا حکم آ جُلے اور اللہ نافرمان لوکاں بدیت نی دینی
سورت التوبہ نا رکوع نمبر 3 مکمل

سورت التوبہ نا رکوع نمبر 4
پارہ نمبر 10 نا رکوع نمبر 10

25:- البتہ اللہ تُساں نی مدد کیتی بہوں سارے میداناں بچ اور حنین نے دیاڑے جدوں تُسیں کثرت تے اکٹر گئے او تے تُساں کثرت کوئی فیدا نی دتا اور تُساں تے زمی کھلی ہونڑے نے باوجود تنگ ہو گئی او فر تُسیں کنڈ دے کہ پھر گئے او
26:- فر اللہ آپڑیں رسول صہ تے مومناں تے تسکین لائی اور لشکر لائے جیڑے تُساں نی دیکھے اور کافراں عذاب دتا اے ای سزا اے کافراں نی
27:- فر اِس توں بعد اللہ جِس نی چاہوے توبہ قبول کرے اور اللہ بخشڑیں آلہ بہوں مہربان اے
28:- اے مومنو اِس توں سوا نی کہ مشرک پلید نوں لہزا او نیڑے نہ جُلن او اِس سال توں بعد مسجد احرام نے اور اگر تُساں محتاجی نا ڈر اے تے اللہ تُساں جَلتی ای غنی کر چھڑسی او آپڑیں فضل نال اگر چاہوے بے شک اللہ جانڑنے آلہ حکمت آلہ اے
29:- تُسیں اُنہاں لوکاں نال کُلو جیڑے ایمان نی آنڑنے اللہ اور قیامتی تے اور نہ حرام سمجھنے نوں جو اللہ تے رسول صہ حرام کیتا اے اور نہ دین حق آں مننے نوں اُنہاں لوکاں بیچوں جیڑے اہل کتاب نوں ایتھے تک کہ او ذلیل ہوکہ جزیہ دیون او
سورت التوبہ نا رکوع نمبر 4 مکمل

Leave a Reply

Leave a Reply

This site uses Akismet to reduce spam. Learn how your comment data is processed.

%d bloggers like this: